القوات البحرينية تضرب وتتحرش جنسياً بنساء المعتقلين

حازم ابو اسماعيل وتحريم الخروج على الحاكم

حازم ابو إسماعيل
الحاكم اللي بينفذ شرع اللة لا يجوز الخروج علية و إن سرق

علشان ما ننساش الناس اللي راحت علشان الحرية

إنجازات المجلس العسكري حامي حمي البلاد

إدخال الجمال علي المتظاهرين في الميدان فيما عرف بموقعة الجمل
اللة الموفق و المستعان
الكشف علي بكارة البنات و لا أجدع داية
الكبيرة بقي : صباع الفنجري
فض اعتصام ميدان التحرير في 9 ابريل بالبيادة
عرفنا أن صربيا هي اللي كانت بتمول الثورة
الجدار العازل اللي بيحمي سفارة إسرائيل " أصل بيني و بينكم السفير الإسرائيلي حساس شويتين " بس و اللة الناس عداهم العيب كتبوا علي السور اللي بيحمي سفارة إسرائيل مصر فوق الجميع!!!!!
و جدير بالذكر الاعمال الفنية اللي بيقوم بيها الجيش من تشكيلات رائعة لعساكر الامن المركزي علشان يحمي الصينية لان الصينية ذات موقع استراتيجي اهم من الحدود
طبعا ما نقدرش ننسي أنة دة كان نتيجة طرد المتظاهرين اللي كانوا مبوظين شكل الميدان بأسلوب حضاري " مش مصدقني راجع الصور"
طبعا ما ننساش كتر خيرهم جابولنا العيد بدري يوم
و خلصوا من بعض الإراهابيين لا لا مش اللي حرقوا الكنيسة يوووووووووووووووة لا بردوا مش اللي ضربوا الجنود علي الحدود لا يا ابني و لا اللي احتلوا القسم في العريش دي كلها عيال هايفة و حتتلم بإذن اللة أنا بأتكلم عن الاخطر من كدة بكتير التراس الأهلي أيوة التراس الأهلي!! أصلوا دة تنظيم خطير أة و اللة اخطر من السلفيين علي البلد و حولوهم علي طرة شفت الجمال يعني العيال حينوبهم من العز بتاع جمال و علاء
الأهم أن المجلس قرر يخلص من المدونيين اللي " حيبوظوا البلد" وحيجرم التدوين و الكتابة علي الانترنت يعني كل واحد حيحط لسانة في بقة و يقعد ساكت مين بقة يا ولاد اللي مهيص في الموضوع دة أخواتكم الاخوان
الأهم من كل دة هو عودة الشرطة للعمل بكامل جبروتها قصدي قوتها و ان الرئيس "هشتكنا و بشتكنا لسة بيتعملوا تحية عسكري"و

اللة الموفق و المستعان

من تونس لمصر لليبيا .... هل نجح المد الثوري في البلدان العربية

دخول الثوار طرابلس سجل ثورة ليبيا في مصاف العظماء و الملاحم التاريخية ربما كانت ثورة ليبيا هي الأقوي في كل الثورات العربية الحالية ليبيا فقط لم تسقط فقط نظام القذافي بل اسقطت معة أعوانة و مؤيدية و من حاربوا في صفة أدمي 7أشهر مرت علي ليبيا نستطيع أن نقول أن ليبيا ستستطيع الان أن تبني البلد علي نضافة خاصة في وجود مجلس انتقالي جاهز تم تنظيمة و عملة اثناء الحرب يا تري يا مصر قدامك قد اية علشان النظام يتغير بجد؟؟؟؟

رمضان كريم

اليوم مافيش خناق لا إسلاميين و لا قوميين و لا ليبراليين النهاردة أول يوم رمضان كل عام و انتم بخير

جمعة وحدة الصف.......... صف الإسلاميين طبعا

إسلامية..... إسلامية،، و الشعب يريد تطهير التحرير و كلنا أسامة يا أوباما في إشارة لحبيب الملايين أسامة بن لادن شهيد غباؤة و جهلة هكذا بدأت جمعة "توحيد الصف " أو كما أطلق عليها بعضا ممن كانوا في التحرير جمعة التوحيد و النور... و ازدحم الميدان و الشوارع المحيطة من حولة حتي المدرسة الألمانية في محمد محمود و حتي مول البستان في وسط البلد أكتظ الميدان بالذقون الطويلة في ما كان أشبة بثورة إسلامية علي الثورة الليبرالية .... بعد ما قام من قام من الشباب بالتضحية بنفسة من يوم 28 يناير حتي خرج مبارك بينما كفر أصحاب الدعوة السلفية الخروج علي الحاكم و فتاواهم لازالت موجودة علي الانترنت لن يستطيعون محوها بينما كانوا مختبئين في جحورهم و كان الشجعان من ابناء الوطن يموتون كل يوم الأن يخرجون علي الثورة قائلين إسلامية إسلامية ...... يمسكون بأصحاب الأفكار المختلفة في الميدان مكبلين و ينادون عليهم العلماني عدو اللة " الحمد للة أن احدا لم يقام علية الحد حتي الان".


لم تظهر القوي الليبرالية بكامل قوتها و لم يبدأو بالهتاف مدنية مدنية إلا من ساعة واحدة بعد أن خرج الأخوة من الميدان ربما إعمالا للعقل فأي هتاف مضاد في الميدان اليوم كان لينتهي بمجزرة جماعية و هو ما لايريدة أحد و لكن الصورة ظهرت أن السلفيين أقوي و أكثر إرهابا و هم لا يقبلون الاختلاف في الرأي أو الهتاف المضاد ولذلك حرصت القوي الليبرالية علي إيثار السلامة و عدم المواجهه ولكن ...... بعد اليوم كل الحسابات قد تغيرت لا أريد أن أسمع من أحد كلمة وحدة الصف و أن كل التيارات تريد السلامة لمصر مما ظهر اليوم فالكل لا يريد سوي مصلجتة الشخصية و مصلحة السلفيين هي السلطة و لذلك هم لا يمانعون في مصاحبة المجلس العسكري و أمريكا و اي من كان و لو كان الشيطان نفسة فالضرورات تبيح المحظورات و هم يحفظون هذا الحديث عن ظهر قلب و يعلمون أهميتة لهم جميعا .

الدروس المستفادة من اليوم:
محدش يسمع كلام نوارة نجم لانها واضح انها يأما ما بتفهمش سياسة يأما ما بتفهمش خالص بعد ما لمت الشامي علي المغربي و راحت صالحت السلفيين قال علشان وحدة الصف ... السلفيين أـدوا كل القوي المدنية النهاردة علي قفاها قفا مخبرين محترم و ظهر السلفيين بقوة مقصودة و صمت الليبرالين علشان ما تبقاش مدبحة و أدي أخرت اللي يمشي ورا نوارة.

الدرس الثاني كل القوي خصوم في المعركة السياسية و أي محاولة لإدماج القوي السياسية زي الانبطاح السياسي اللي عملة حزب الوفد لما راح باع نفسة للشيطان " الإخوان " علشان يضمن لنفسة كام مقعد في البرلمان القادم و ظهر السيد البدوي مدافعا عن موقفة السياسي بأنة براجماتي و يجب أن يحسب أين مصلحة حزبة. يعني من لااخر كل واحد يدور علي نفسة و الليبرالين علشان يعيشوا في البلد دي و ما يتكلوش حاف من السلفيين لازم يتكتلوا في كتلة واحدة كبيرة مع بعض ما فيش حل تاني غير كدة

و اخيرا و ليس أخرا اتلموا و حددوا مطالبكم و وحدوا صف الناس اللي لسة مخها نضيف بدل ما تودوا البلد في داهية.