لما الكلام يوحع

في اوقات بيكون الكلام فيها زي قلتة لانك مهما تتكلم كلامك ة و لا حيغير حاجة..... و هو كان اية اتغير قبل كدة بالكلام علشان نتكلم دلوقتي.... بس محتاجة اقول قبل ما مخي ينفجر......

حقوق المرأة اللي بيتمسخر بيها بعض اللي مسميين نفسهم فنانيين بداية من محمد صبحي و سخريتة من الجمعيات النسائية في مسرحية تخاريف (اكيد فاكرين جمعية المرأة المتوحشة و نسيت اربي ضوافري و كدة )  و طبعا فاكرين  يا رجال العالم اتحدوا و كل الهجص اللي كان فية...... و مرورا بالحاج متولي و نهاية بالحاج فواز اية. كي. اية "احبوووووش" ... حقوق المراة اصبحت دعابة ثقيلة و ماسخة بعد ان هوت الاقنعة عن اغلب المتشدقين بها ان المسألة بالنسبة لهم كانت سبوبة و اكل عيش علشان يقربوا بيها من سوزي و لما راحت سوزي ما شفناش موقف واحد يغزي عين الشيطان من السيدات الفاضلات بتوع حقوق المرأة فين فرخندة حسن من الستات و البنات اللي تم التحرش بيهم في ميدان التحرير في مسيرة ضد التحرش.... فين المجلس القومي من السادة بما لا يخالف شرع اللة بكل رؤيتهم الظلامية لقوانين الاحوال الشخصية... فين المجلس القومي للمرأة من تأسيسية الدستور اللي بيتحط فية دلوقتي كل "بما لا يخالف شرع اللة"

ازاي في ناس بالقدرة دي علي اللامبالاة قدام حق 51% من المجتمع...... اللي يفقع و يفرس ازاي في ستات من البني ادميين اللي بيقع عليهم الظلم دة مبيفكروش حتي في مجرد الثورة لكرامتهم..... ازاي تبقي شايفة حقك و حق بنتك بيضيع كل يوم حتة و انت راضية و ساكتة ....... هو في اية؟؟؟؟؟؟ هو احنا لية الستات عندنا مبتغيرش علي حقوقها؟؟؟؟؟

سيظل بقي الكوم الكبير وصول الاسلاميين للحكم .... و دة بقي اللي بيخليني مش عارفة انام بليل لما هي الحالة ج كدة و احنا لسة مدخلناش في عصر حرام يا اختي و النقاب فرض امال بقي الحالة حتبقي اية ..... و نفسي افهم اية مستوي الضغط اللي لو مورس اكتر من كدة علي الستات ممكن  ينفجروا ماهو اكيد هما لازم ينفجروا و يعملوا ثورة... مظاهرة..... اي منظر.... نقول بية ان احنا عندنا دم و عندنا احساس. دة حتي احساس المرارة اللي انا باحس بية مش موجود عند ستات كتير من اللي بقابلهم عندهم حالة من اللامبلاة غير عادية و تعايش سلمي مع كل الانتهاكات اللي بتحصل ضدهم. 

في وسط كل  دة بتخيل الرائدة درية شفيق( التي اطلقت عليها إذاعة مونتي كارلو انها الرجل الوحيد في مصر) سنة 51 و هي بتقتحم البرلمان المصري علي رأس 1500 ست للمطالبة للسيدات بحق التصويت في الانتخابات البرلمانية و الترشح لها ايضا و اقول لنفسي لية حركة تحرير المرأة وقفت عند الدكتورة درية ..... لية ماحصلش ان واحدة ست طلعت  و اقتحمت مجلس الشعب و اعتصمت فية لما فكروا يلغوا قانون الخلع و يقللوا سن الحضانة؟؟؟!!

واجعني قوي ان تكون الستات و المسيحيين في مصر هم ملطشة العصر الحديث... واجعني قوي ان صفوت حجازي ووجدي غنيم و اتباع سيد قطب هما اللي يحطوا دستورنا.

سكت الكلام....

سموا الاشياء باسمائها ..... انها الكراهية

انة مقال مني الطحاوي الذي نال حظا لا باس بة من الشتائم و اللعنات و ربما بعضا من اللة عليكي يا ست اعد كمان ..... قريت المقال لقيت انة بعض الناس بتهوي الضجة للضجة فقط ..... هي مني الطحاوي كانت قالت حاجة جديدة مثلا و لا علشان الموضوع تحول من كلمات براقة زي التمييز ضد المرأة و العنف ضد المرأة و اضطهاد المراة الي كلمة اكثر وضوحا و شمولية و تلخص كل ما سبق في كلمة بسيطة الا و هي كراهية المرأة الموضوع بسيط وسهل الستات فعلا مكروهة في عالمنا العربي و ستجد من ينبري ليجد اعذار و ربما اسباب من الدين ليبرر لنفسة و يعطي لنفسة الحق في هذة الكراهية......... اية المشكلة بقي هي مني الطحاوي كانت قالت حاجة جديدة.

مش مجلس الشعب قدم طلب لمراجعة كل القوانين الاسرة التي تم وضعها ايام المخلوع بحجة ان هذة القوانين الهدف منها هو تقويض بنيان الاسرة المصرية و للي ما يعرفش اية هو بنيان الاسرة المصرية احب اعرفة.... بنيان الاسرة المصرية في ما قبل العصور الاسلامجية الحديثة هو عبارة عن رجل بكرش.... امراة محجبة و يا حبذا لو كان خمار (النقاب لسة مش واكل مع الرجالة قوي بس جاي) شوية مقاريض لا يقلوا عن ثلاثة و إلا كانت وحشة في وش الست (مش خصبة و كدة انتوا فاهمين طبعا)اما بقي الروتين اليومي فهو الرجل ذو الكرش يستيقظ من نومة ليجد الافطار جاهز و الحمام جاهز و ياحبذا لو الست جت ليفتة طبعا كل دة بالنسبة لة مسلمات مش امور يستحق الشكر عليها ...المقاريض صاحيين و لابسين وجاهزين للمدرسة و طبعا في حد قبل كل دول صاحي علشان يفطر و ياكل و يشرب الجميع و ينزل الرجل ذو الكرش مع باقي المقاريض و هو متافف من انة حيشيل مسئولية توصيلهم للمدرسة ينزل حتي بدون كلمة شكر للزوجة اللي في الاغلب كانت خريجة جامعة و متعلمة و في الاغلب برضة كانت بتشتغل قبل ما تشوف خلقة الكائن ابو كرش بس لان المرأة في مجتمعنا كائن متربي علي التنازل كانت هي الشخص اللي لازم يتنازل عن احلامة في مقابل الزواج من ذو الكرش علشان ما تخدش لقب عانس.
هو دة بروفايل الاسرة المصرية و البنيان اللي خايفين يهدوة نواب و نايبات مجلس الشعب خايفين من ان الست تبقي اكتر من مجرد دادة و خدامة في بيتها و انا هنا مش بقلل من من دور الست كأم لكن مش معني كدة انها تتحول لعبدة. عبدة كل هدفها في الحياة هي راحة رجل لن يسهر ابدا علي راحتها و لن يكون ابدا بجوارها و استثني من ذلك بعض الرجال و ان كانوا قلة.

 اية بقي المشكلة .... المشكلة انة اي تحول حيحصل في هذا الشكل الاسري بداية من وعي المرأة بحقوقها نهاية باستعمالها هذة الحقوق فعلا حيهد صورة المراة العبدة و حيجرأ الستات لطلب المزيد من الحقوق و هنا هي المشكلة الرجالة لا يقبلون المشاركة هما مش عايزين الستات هو دة لب الموضوع زي ما الانجليز بيقولوا bottom line  .....  شرع او مش شرع الرجل العربي لا يجد في المرأة اي كان منصبها اكثر مما يجد الرجل المخمور في الراقصة الشرقية ... حاصلة علي الدكتوراة بس صدرها صغير..... بتتكلم ثلاث لغات بس الهنش بتاعها كبير و هكذا دواليك. الرجل يستطيع ان يستخدم عقلة في ابداع اعظم الاشياء و لكن عندما يري امراة لا يستطيع الا ان يفكر بنصفة السفلي .

و تظل مشكلة بنيان الاسرة المصرية الذي يجب ان ستمر فوق اجساد النساء. لا بأس من ان تضرب قليلا من زوجها .... دي محبة يا هبلة.... لا ضير ان تجد صور لة في اوضاع مخلة يشاركها مع صديقاتة علي الفيس بوك.... الست العاقلة تطنش و تكبر  دماغها كل الرجالة بيخونوا.... لا بأس من انها لا تحصل حتي علي حقوقها الشرعية في الفراش ..... الست المتربية ما تتكلمش في الحاجات دي.

هذا هو البنيان الذي يحاول المجلس جاهدا في الابقاء علية كيان قائم علي الظلم و عدم المساواة كيان يرمي بكل ثقلة علي كتفي امرأة حمولة و يطلب منها ان لا تتأوة من ثقلة ..... لية ؟علشان صوت المرأة عورة.

و بعد كل دة نجد ان مني الطحاوي لازم تتشتم علشان كشفت النقاب عن الكلمة التائهة عن قاموسنا في وصف حالة المرأة في بلادنا أنها الكراهية بدون تجميل او تزييف.

للحديث بقية......

http://www.foreignpolicy.com/articles/2012/04/23/why_do_they_hate_us?page=0,3

الصمت

عندي كلام كتير نفسي اقولة بس محشور في زوري مش عايز يطلع منظم و لا عايز حتي يطلع خلاص

اقول حاجة واحد بس إياكش تولع بجاز أنا زهقت!!!!!

إحنا معندناش ستات في مصر

اكتشفت اخيرا ان مصر مافيهاس ست...... اة و اللة مافيهاش ست.... و دي بالمناسبة مش مدح دة شتيمة تقدر تعتبرة سب دين كدة ...... زي ما حد يدخل بيتكوا و يقولكوا يا عيلة ما فيهاش راجل كدة اكيد مش حاتخدة بالحضن و تديلة واحدة فرنش.... احنا بقي بلد مافيهاش ست لية علشان البلد دي لو فيها ستات بجد ماكنتش قضية سميرة إبراهيم تطلع فشنك...... البلد دي لو فيها ستات بجد كانت وقفت وقفة ست واحدة و جابت حقها بايدها.......... بس إحنا بلد ماعلافتش تجيب ست.

مستنيين اية لما البرلمان يمنعكوا من الخروج من البيت إلا علي القبر زي ما قال سيد قطب .... و لا لما تلاقي جوزك داخل عليكي بواحدة و يقولك حقي الشرعي يا مرا و لو مش عاجبك امشي....مستنية لما تتنقبي بالعافية و لا لما تتمنعي من السواقة.... مستنية لماحازم صلاح ابوإسماعين يقعدك في البيت و يخليكي تمدي ايدك او تشتغلي اقدم شغلانة في التاريخ.......انا عايزة افهم حتفضلوا خانعين و صامتين و انصاف بشر كدة لحد امتي ..... خلاص الكرامة اللي خلقها ربنا معانا بالفطرة ماتت جواكوا .... امتي حتقوموا بعد ما يدهسوكوا اكتر من كدة.

اة يا بلد ماجبتش ست

هرتلة

مافيش حاجة غير اني عايزة اتكلم بقالي زمن ما قلتش حاجة و لو ان اللي حاقولة عمرة ما حيفيد بس عايزة اتكلم.....

سميرة إبراهيم ...... الدكتور المحترم خد براءة و السلفيين بيعملوا تجميل لمناخيرهم و يطلع الدكتور مدرس العاب.... و الاخوان و السلفيين برضوا بتوع اختي كاميليا فرحانين في بنت محجبة اتعرت و بيقولوا اية نزلها علشان تتربي

و المجلس العسكري سفر الامريكان المتهمين بقضية تمويل غير مشروع الهدف منها الاضرار بمصالح البلد ....و الشرطة قفلت باب الاستاد باللحام علشان العيال تموت... و اسماء محفوظ محكوم عليها بسنة سجن في تهمة ضرب شحط طول بعرض ..... و حسني مبارك لسة مارحش طرة بعد سنة من الثورة.... و دوا الاكتئاب بتاعي شاحح من السوق و الدكتور اضطر يغيرة .... وجلال عامر مات.... عكاشة قدام السفارة الامريكية..... و 6 أبريل بقوا خونة....و التحرير بقي عيب .... هياتم لرئاسة الجمهورية.... و السلفيين حيمنعوا المواقع الاباحية.... و حيبقي في مناهج للولاد غير البنات.... و سفارة اسرائيل بقت في التجمع الخامس....قتلة الشهداء في السيدة زينب براءة.... و الجيش حمي الثورة..... و عساكرنا ماتوا علي الحدود.... و بورسعيد رافعة علم إسرائيل و بتهدد بالانفصال عن مصر....بس المجلس حمي الثورة.... النائب العام ماجبش اللي عملوا مذبحة بورسعيد بس جاب احمد دومة بتاع المجمع العلمي..... و احمد حرارة اتعمي..... و الغازطلع منتهي الصلاحية.... بس الجيش حمي الثورة.... ابو الشهيد احمد بسيوني مات و حق ابنة ماجاش...... و الشرطة نفسيتها تعبانة.... بس الجيش حمي الثورة.

ان تموت سحلا

لا اجد من الكلمات ما اعبر بة عن ما يحدث في التحرير و لكن ساقول كلمة اخيرة قبل ان انزل

احنا اللي عملنا في نفسنا كدة سيبناهم يستفردوا بينا واحد ورا التاني

ماوقفناش لما قبضوا علي شباب زي الفل و سيبناهم يقولوا عليهم بلطجية و

موقفناش لما سحلوا المسييحين اخواتنا قدام ماسبيرو كنتوا فاكرين اية ان الدور مش حييجي عليكوا طب مبروك الدور جة و مينا مش احسن مني
انا نازلة و اللي عايز يقعد خايف علي لقمة عيشة بالهنا و السفا ياكلها متعاصة بدم الغلابة اللي بيموتوا علشانة

سلام يا بلد الكلام

حالة من كل حاجة وحشة تصيبني

أنا لن أدعي بأني من العارفين بالأمور في موضوع ماسيبرو و لا كنت في المظاهرة و لا وقفت هناك و هكذا سمعت السلسل الزمني للموضوع:

الساعة الخامسة في مظاهرة للاقباط جاية من شبرا

أنا و للة الحق قلت عادي مش أول مرة يعملوا مظاهرة و عارفة إنها حتصفي علي مافيش

الساعة السابعة الاقباط ضربوا نار علي الجيش و في اتنين عساكر ماتوا

رفعت حواجبي في حالة من الذهول الممزوج بعبط أقباط اية اللي ضربوا نار دول عمرهم ما بيمشوا بسلاح علشان بيخافوا حد يمسك فيهم و خاصة بعد موضوع كنيسة إمبابة

و هنا بقي لقتني بانظر حولي و للصدفة كنت في مكان عام و إذ فجأتن كل اللي قاعد مع أصحابة و لا زنقلة مزة تحول بقدرة قادر لاحمد مظهر في فيلم صلاح الدين الايوبي و رايح ماشاء اللة ما شاء اللة يحرر مصر من الصليبين اللي ظهروا إذ فجأتن بردة في ماسبيرو وكل واحد قرر أن الغازية "المسيحين " لازم ترحل !

بصراحة بقي لقيت الشجاعة وخداني و بقولهم

- يا جماعة استهدوا باللة و هو احنا لسة اتأكدنا الناس دي ماتت و لا أية

و مين اللي ضرب نار عليهم؟ إحنا حنروح نتخانق كدة و خلاص و لا هي فش غل و لا أية؟؟؟؟

-يعني أية؟؟؟ دة كان ردهم طبعا يعني المجندين الغلابة اللي ماتوا دول دمهم يروح هدر؟؟؟؟

- محدش قال دمهم حيروح هدر بس تنأكد ؟؟؟

- نتأكد من أية هو التليفزيون حيكدب ؟؟؟!!!

- لية يا جدعان هو التليفزيون أول مرة يكدب مالكوا محسسني أنكو بتتكلموا علي السي أن أن! دة التليفزيون المصري الشهير بابو لمعة!و لا نسيتوا و لا انتوا صدقتوا الحبة بتوع تبنا و ندمنا دول !! دة تليفزيون اصلا رقاصة و هو عارف أنة رقاصة و مش عايز يتوب!

لقيت نفسي بأدن في مالطة و المذيع اللة يحرقة منفعل و هو بيذيع تقولش اللي ماتوا من الجيش دول (و الي طلع بعد كدة أنة محدش مات و لا حاجة) واحد فيهم كان جوز أمة!

لقيت أنة مافيش حل و أنا كمان كان لازم اروح للدكتور (بتعالج من الكوليستيرول عقبال عندكم) و تحركت من المكان اللي كنت فية و رحت وسط البلد ( علشان حظي الاغبر عيادة الدكنور هناك) لما وصلت الساعة 8:30 كانت وسط البلد صاحية و إن كانت العربيات بتيجي هربانة من التحرير و عربيات الإسعاف طول الطريق بالهبل بتجري ناحية الكورنيش .

طلعت العيادة الساعة 8:30 لما نزلت الساعة 10:30 حسيت كانني نزلت في مكان تاني الشارع المنور بقي ضلمة المحلات قفلت مافيش و لا عربية راكنة في الشارع غير عربيتي و الحياة حكيكتن كانت زبادي خلاط ....

لقيت واحد من بتوع اللجان الشعبية بيقولي متروحيش ناحية التحرير و لفي من ورا... و طبعا لاني بحترم رجل اللجان الشعبية اللي بيخدمني ببلاش اكثر من ظابط المرور اللي بيتأمر عليا بفلوسي سمعت كلامة و روحت من ورا...

ابصلك بقي علي الفيديوهات الاقيلك المسيحيين مفحوتين ضرب، طب مين يا عم المجندين اللي ماتوا و لادول سر حربي ... لا ياعم ما فيش حد مات في جرحي بس ...

لا و الجديدة بقي استغاثة علشان ننزل ننجد الجيش !!!

أنا عايزة أعرف مين اللي راضع من بز إبليس اللي تفتق ذهنة عن الحيلة دي يوقع المسلمين في المسيحيين بحجة الدفاع عن أية يا ولاد عن الجيش!

" دة حد إبن وسخة"

جيش أية اللي ندافع عنة ؟؟؟ الجيش بمدرعاتة بدباباتة بسلاطاتة ببابا غنوجة عايز حد يدافع عنة قدام مين ؟؟؟ قدام شوية مسيحيين ؟؟؟ دي العيال شكلها أغلب من الغلب !!!

لا وعلشان اليوم يكمل ( ماهو أنا اصلي كوليسترولي دة ما ترفعش من شوية) الاقيلك المذيع .... مش عارفة اشتمة أقول في حقة أية بس ما هو هو أصلا مفضوح اللي اسمة عمرو اديب جايبلي قال طلعت السادات علشان يعلق علي الاحداث!!! طلعت السادات مين يا فلول منك لة ؟؟؟

لا و الخيبة بعد كل السحل و الضرب اللب العيال اتضربتة طلعت السادات أفندي قال أية بيقولوهم اتلموا !! يا أخي اتلم انت و اللي زيك ؟؟ جاتكوا البلاوي مليتوا البلد!!

و أدي الفيديو أهة بتاع الفلول مع بعضيهم!!!

http://youtu.be/1P5V6Py_LTc

و للحديث بقية و حسبي اللة و نعم الوكيل