محاكمة كريم عامر :

قد تختلف مع كريم و قد يكرهة و لكن بعيدا عن العواطف هل ما يحدث الأن لكريم عامر هي العدالة ، القاضي يرفض طلبات محامية لعمل تحليل هندسي للسيرفير الذي يعمل علية موقع الحوار المتمدن، ناس تقف في وسط المحاكمة و تتهمة بالكفر و تريد إقامة دعوي حسبة علية، و كأنها مش قاعة محكمة كأنها السيرك القومي، و شحذ رأي عام ضدة هل ما يحدث مع كريم الآن هو العدل.

علاء الأسواني و رائعة جديدة

أشتريت الكتاب الجديد شيكاجو للمؤللف الرائع علاء الأسواني الكتاب هايل و شدني من أول صفحة
أقروة يا شباب علي ضمانتي

أنا ما بكرهش إسرائيل

من كام يوم كنت مع إحدي الأخوات الصالحات و جرنا الكلام للحوار عن إسرائيل فأتكلمت عن الحياة السياسية في إسرائيل بموضوعية، لقيت الأخت الصالحة بصالي و تعلو وجهها نظرة من الاستنكار و الاشمئزاز و التخلف العقلي مندمجين سويا و لقيتها بتقولي "أية دة أنت إزاي بتتكلمي عن إسرائيل كدة ، دول بيقتلوا الأطفال ؟؟؟؟؟!!!" كان ردي و بدأت بالظهور عليا إمارات الإرهاب الفكري اللي أنا علي وشك التعرض له و قلتلها " أنا بتكلم بموضوعية عن الحياة السياسية ؟؟؟" و قبل ما أقدر أكمل كلامي قاطعتني و قالت لي " أنت ما بتكرهيش إسرائيل؟؟؟" لقيت إن السؤال في حد ذاتة بصراحة مستفز و الموضوع كبر في دماغي لأني فعلا ما بكرهش إسرائيل و لا بحبها إحساسي ناحيتها نفس إحساسي ناحية مدغشقر بالضبط فبصراحة زي ما بيقولوا باللغة العربية لم أجد بدا من مواجهتها و قلتلها " إن أنا لا بكرة و لا بحب إسرائيل إحساسي ناحيتها حيادي و أكرهها لية؟؟ " لقيتها بصالي من فوق لتحت و بقها لزق في مناخيرها من القرف يا عيني اللي هيا حاسة بية مني و قالتلي إن أي عربي لازم يكرة إسرائيل علشان إسرائيل حاربتنا و أستشهد منا كتير في الحروب دي و علشان بتقتل في فلسطينيين كتير و لبنان اللي دخلتها من غير إحم و لا دستور و غيرة و غيرة .

هنا انفجرت و لقيت إن مؤشر الاستفزاز عندي وصل إلي حدة قلتلها معلهش يعني و هي لما إسرائيل دخلت مصر في سنة 1956 كانت لوحدها ولا معاها دولتين كمان و كانت الحرب دي بإيعاز من الدولتين التانيين؟؟ إشمعني ما عملناش عداء أزلي مع بريطانيا العظمي اللي قتلت الطلبة أثناء المظاهرات في مصر و ذلت المصريين كتير و نفتهم و هزت صورة الملك أمام شعبة و لا معملناش عداء أزلي مع فرنسا اللي أحتلت الجزائر 100 سنة و بهدلتهم و قتلت منهم مليون واحد ؟؟ إشمعنا الدول دي دلوقت دول صديقة يعني !!! وبعدين هو العداء اللي عملة عبد الناصر مع إسرائيل في الخمسينات و الستينات علشان يكسب بية شعبية عربية طاغية و اللي دفع ثمنة المصريين من أولادهم و فلوسهم كانت السبب فية إسرائيل بردة و لا كان السبب فية أنة القيادة السياسية أدخلت البلد في دايرة من الحروب ماكنتش مستعدة لها في وقتها، لمجرد إنها تكسب شعبية مع ناس أصلا مايهمهاش مصلحة البلد دي، و حرب الست أيام (اللي إحنا بنسميها النكسة) اللي أتهزمنا فيها و كانت فضيحة و جرسة بردة إسرائيل هي السبب فيها ، هي اللي قالتلكوا صدقوا الروس و ما تبدأوش بالضرب (إشمعني صحيح بعدها ما كرهناش روسيا بس ما علينا) ، هي اللي قالتلكوا خلوا المشير ليلتها يسهر سهرة دلع عند الست برلنتي بدل ما يشوف استعدادات الجيش اللي هو القائد بتاعة، و ما علينا من كل دة، كلة راح لحالة نتكلم بقي في عصر السلام من ساعة ما عملنا معاهدة سلام مع إسرائيل و لحد دلوقت هل إسرائيل أعتدت علي مصر؟؟؟!!! و لو حتي مرة واحدة ؟؟؟ لا طبعا محصلش ...
طيب هل حصل لمرة واحدة إن إسرائيل رفضت وساطة مصر في أي عملية سلام بينها و بين أي دولة عربية أو بينها و بين الفلسطينيين محصلش...

يعني إسرائيل مابتخدش نوايا مصر للوساطة ما بينها و ما بين الدول العربية مأخذ حذر أو خوف من سوء النية في حين إن أحنا لو إسرائيل قالتلنا صباح الخير يقعد المحللين السياسيين بتوعنا يفكروا يا تري لية إسرائيل قالتلنا صباح الخير في الوقت دة . طبعا أنا مش بالسذاجة دي بردة إني أعتبر سياسي إسرائيل حسني النية بس كمان سياسيين إسرائيل زي أي سياسيين في العالم مهماش بديل و قرون و ماسكين شوكة كمان ناس عادية يعني لهم مصالحهم اللي عايزين يحموها و دة مش غلط و مش حاجة السادة السياسيين بتوعنا ما بيعملوهاش . كمان أنا مانكرش أن تعامل إسرائيل في حروبها بيكون بمنتهي الوحشية و أنهم القتل عندهم أسهل حاجة أثناء الحرب بس في حاجة تانية إحنا ناسينها هل الجنود بتوعنا وقت الحرب يكونوا طيبين و قلبهم علي اللي بيحاربوهم و لا بيتعاملوا بعنف بردة ؟؟؟
و أخيرا أنا إسرائيل ما عملتليش حاجة علشان أكرهها حاربتنا و حاربناها كسبتنا و كسبناها و بعدين بقي في سلام يبقي لية لازم يكون واجب وطني إن كل واحد فينا يكرهها مش لازم نحبها أنا عن نفسي مبحبهاش و زي ما قلت لية تحفظات كتير علي حقوق الأنسان و طريقة تعامل الجيش الإسرائيلي مع الناس و اللي هي بالمناسبة نفس تحفظاتي علي التعذيب اللي بيحصل في السجون المصرية لكن معنديش سبب قوي كمان يخليني أكرهها، لكن لقيت إن الأعلان عن عدم كرهك لإسرائيل( مش الإعلان عن حبك ليها ) ممكن يوديك في داهية و يخلي العيون اللي حواليك تحمر و تبقي روحت في داهية و علشان كدة انا قررت أعمل شوية تعديلات علي الأغنية الخالدة بتاعة الأستاذ شعبان عبد الرحيم

مابكرهش إسرائيل و مش حأكرة إسرائيل
مابكرهش إسرائيل و أقولها لو أتسأل
إنشاء اللة أموت قتيل أو أخش المعتقل

أمجاد يا عرب أمجاد

الجمهوركية

أضاف لعرب للحضارة كثيرا العرب أخترعوا الصفر و علم الأجتماع و كانوا روادا في الكيمياء و الفيزياء و أنقطعت ريادتهم العلمية لكل حضارات العالم لقرون طويلة حتي حديثا،

فلقد أضاف العرب إضافة جديدة للانظمة السياسية الموجودة حاليا فهناك نظام الملكية و الجمهورية و الإمبراطورية و المستشارية و أخيرا إضافة أنظمتنا العربية لنظام الجمهوركية الذي هو مزيجا من نظام الجمهورية (الذي أثبت فشلة نظرا لأقتناع قادتنا العرب بعدم قدرة شعوبنا العربية النونو علي أختيار حاكمها )و نظام الملكية الذي يتيح لقادة كثير من الأنظمة العربية نقل السلطة الي أولادهم الذين تربوا في مدرستهم كما يقول كذابين الزفة اللي بيروجوا لفكر الجمهوركية و علي الشعوب العربية النونو إنها تبوس إيدها شعر و دقن زي ما بيقول اللمبي و تحمد ربنا إن قادتها عندهم هذة النظرة الحكيمة و التفكير بعيد المدي في الشعب الغلبان اللي مش عارف مصلحتة فين

أما بقي الستات في القضية دي هما دور الكومبارس الصامت لأن الموضوع من أولة لأخرة رجالة في رجالة لا عمر ست حتورث الحكم و لا حتي حيتاخد رأيها و أشمعني هي يعني اللي حتقول رأيها ما إحنا عندنا شعب كامل مليان رجالة بشنبات محدش بيقول فية رأية

و لا حياة لمن تنادي

آخر خبر

التليفزيون المصري سينتج مسلسل تليفزيوني لفيلم عمارة يعقوبيان بعد حذف شخصية حاتم رشيد الصحفي الشاذ
علشان أصلها شخصية مش مؤدبة و حتجرح حياء الناس فال يعني الناس مقرتش القصة و لا دخلت الفيلم


تخلف عقلي و حول فني!!!!

ليس للتعليق

عشت عمر طويل فاكرة إن مشاكلي مع الناس اللي حوالية أنة محدش فاهمني، محدش عارف ولا فاهم أنا عايزة أية لحد أما انا عرفت إني أنا نفسي مش فاهمة نفسي.

مشكلة إنك تعيش العمر كلة فاهم إنك صح مش كدة!!!

صدام حسين :

مليون بلوج إتكلم علي عملية إعدامة سواءا بالتعاطف معة و تصويرة في شكل بطل شعبي أو بشتيمتة و شتيمة أيامة السودة

إحساسي من ناحية عملية إعدام صدام مختلفة انا لم أتعاطف أبدا معة خلال محاكمتة و ماكنتش شايفة إنة أتظلم و لو حتي إتظلم فدة شوية من أفضالة اللي مغرقة عراقيين و إيرانيين و كوايتة و مصريين كتير

لكن لما شفت فيلم الإعدام (بصراحة علشان أصدق أنة فعلا مات ) معرفش لية لقتني بدمع يمكن لأن صدام كان مرحلة كبيرة قوي في تاريخنا العربي، يمكن علشان كنت بتابع أخبار حروبة و بلاوية من و انا طفلة فأرتبط إسمة لفترة طويلة في ذهني بمراحل نضجي السياسي.

حقيقي مش عارفة بس كل اللي أنا عرفاة إني و مع إن الراجل دة ظلم ناس كتير، بس أنا مقدرتش غير إني أحزن علي أنتهاء مرحلة طويلة و كبيرة من تاريخنا حتي لو كانت مش مشرفة ، و علي أنتهاء مرحلة من تاريخي أنا الشخصي.


الوداع صدام