مصر

مصر

Friday, February 1, 2013

ان تكون ست في مصر

انا بخاف انزل الشارع و دة مش بس من بعد الثورة لا اي حد حيقول ان التحرش زاد بعد الثورة حاقولة لا حضرتك هو بس التحرش بان بعد الثورة، تحب اكلمك عن استاذ الجامعة المحترم اللي كان بيستدرج البنات لمكتبة بعد الساعة اتنين و يحاول يمسك ايديهم و يمكن ما هو اكثر.... طب اهو نفس استاذ الجامعةدة بردة في المحاضرات كان بيقعد البنات في في ناحية و الاولاد في ناحية علشان الاختلاط حرام. و في كلية عملية فني المعمل كان بيستدرج بردة البنات علشان يراجعلهم على الشرائح اللي حتيجي في الامتحان بعد بردة الساعة اتنين اللي هو ميعاد خروج الموظفين و يحاول التحرش بيهم و يمكن ما هو اكتر اذا واتتة الفرصة و لما البنات اشتكوا رئيس القسم الراجل المحترم الكمل قالهم و انتوا اية اللي يوديكوا بعد الساعة اتنين ما انتوا اللي قليلات الادب... و لما الفني دة ماتعاقبش البنات جابت ابهاتها و عملوا مشكلة قاموا ناقليين الفني دة قسم تاني و كان ماشي يا عيني و هو حاسس انة مظلوم و بيحسبن علي البنات.

طيب تحب اكلمك عن المواصلات و اللي بيحصل فيها و لا بلاش اصل الموضوع دة اتهرس في مليون فيلم عربي قبل كدة. طيب اكلمك بقي عن مجال العمل شوية واحدة صاحبتي بنت لطيفة جدا و كانت ليها ضحكة من اجمل الضحكات اللي شفتها في حياتي كانت بقي.... اول ما اتخرجنا هي قررت انها عايزة تشتغل في القطاع الخاص علشان  الحكومة مش جايبة همها في اول انترفيو في شركات دعاية و اعلان معروفة قابلت رئيس مجلس الادارة الراجل المحترم اللي قالها في اخر الانترفيو انا سعيد انك حتشتغلي معايا انت حتبقي زي بنتي ( واضح انة كمان بيتحرش ببنتة) و دة لانة بعد اسبوع من الشغل معاة طلب انها تقعد علي حجرة يا عيني صاحبتي خرجت منهارة و كانت بتحكيلي انها ماكنتش فاهمة لية كل الناس في العمارة اللي فيها الشركة من اول السايس لبتاع السيكيورتي بيبصولها بصات غريبة .... صاحبتي فضلت مقتنعة انة هي اللي فتنت الراجل و انها هي شخصيا تستاهل قطم رقبتها. و اتحجبت و جاتلها فرصة عمل في شركة صرافة بتاعة رجل بيعرف ربنا كويس زي الناس اللي بيعرفوا ربنا كويس و بيحكمونا دلوقتي و الراجل الشهادة للة ما اتحرش بيها بردة دة راجل كبارة فوق 60 سنة الراجل طلبها للزواج علي سنة اللة و رسولة الرجل عداة العيب و قزح علي الاقل هو عايز الحلال بس عرفي..... عرفي لية يا جدو اصل شركة الصرافة باسم مراتة و اخواتها و ميقدرش يتجوزها رسمي و بعدين هو كمان مش عايز خلفة و هي بتحكيلي قعدت اضحك و افتكرت عادل امام في مرجان احمد مرجان "عرفي؟؟؟" احمد السعدني رد علية و قالة "حلال حلال" "طيب ما انتوا كدة بردة مانتمين"
اة اخر اخبار صاحبتي انها مابقتش بتشتغل دلوقتي هي كمان مقاطعاني من ساعة ما اتنقبت و بقت تدي دروس دين في الجامع و ربنا اكرمها و اتجوزت واحد مش اكبر منها بكتير بس متجوز و عندة عيال عقبال عندكم جميعا.
احب بقي اكلمكوا شوية عن اختي الدكتورة المحترمة... كانت بتدي رقم موبايلها لطوب الارض من اهالي المرضي اللي هي بتعالجهم علشان لو عندهم مشكلة يكلموها في اي وقت.... تحبوا تعرفوا كام واحد منهم استغل نمرة تليفونها و حاول يتحرش بيها في التليفون و سمعها اقذر الكلام مع انها كانت بتعملهم خدمة انسانية... و غالبية اللي بقولكم عليهم دول من الناس الغلابة الطيبين الكادحين اللي انتخبوا الريس بتاعنا.... طيب عارفين اختي دي محجبة حجاب طويل قد اية..... الاهم عارفين هي بقت بتعمل اية.... بقت بتعامل كل المرضي بقرف و بقت تقلد زمايلها اللي هي كانت معترضة علي اسلوبهم.

طيب اكلمكوا بقي عن لما دخلت انا المستشفي ببنتي المستشفي الخاص الكبير المحترم .... لا لا الدكتور ماتحرش بية لاني اول ما دخلت شتمتة علشان سابنا ساعة من غير ما يبص علي البنت لا ... اختي التانية مضيفة طيران جاية تزورني في المستشفي قام الدكتور المحترم عايز يديها نمرة تليفونة اة و اللة دخلتلي الاوضة و بتقولي اية الحيوان دة و مش مصدقة انة دكتور بيعاكسها في مستشفي.

خلاص مبقتش قادرة اكمل كلام بس لسة عندي حكاياتي انا الشخصية و دي بقي تتحط في مجلدات حاحكيها ان عشنا


Monday, August 13, 2012

لما الكلام يوحع

في اوقات بيكون الكلام فيها زي قلتة لانك مهما تتكلم كلامك ة و لا حيغير حاجة..... و هو كان اية اتغير قبل كدة بالكلام علشان نتكلم دلوقتي.... بس محتاجة اقول قبل ما مخي ينفجر......

حقوق المرأة اللي بيتمسخر بيها بعض اللي مسميين نفسهم فنانيين بداية من محمد صبحي و سخريتة من الجمعيات النسائية في مسرحية تخاريف (اكيد فاكرين جمعية المرأة المتوحشة و نسيت اربي ضوافري و كدة )  و طبعا فاكرين  يا رجال العالم اتحدوا و كل الهجص اللي كان فية...... و مرورا بالحاج متولي و نهاية بالحاج فواز اية. كي. اية "احبوووووش" ... حقوق المراة اصبحت دعابة ثقيلة و ماسخة بعد ان هوت الاقنعة عن اغلب المتشدقين بها ان المسألة بالنسبة لهم كانت سبوبة و اكل عيش علشان يقربوا بيها من سوزي و لما راحت سوزي ما شفناش موقف واحد يغزي عين الشيطان من السيدات الفاضلات بتوع حقوق المرأة فين فرخندة حسن من الستات و البنات اللي تم التحرش بيهم في ميدان التحرير في مسيرة ضد التحرش.... فين المجلس القومي من السادة بما لا يخالف شرع اللة بكل رؤيتهم الظلامية لقوانين الاحوال الشخصية... فين المجلس القومي للمرأة من تأسيسية الدستور اللي بيتحط فية دلوقتي كل "بما لا يخالف شرع اللة"

ازاي في ناس بالقدرة دي علي اللامبالاة قدام حق 51% من المجتمع...... اللي يفقع و يفرس ازاي في ستات من البني ادميين اللي بيقع عليهم الظلم دة مبيفكروش حتي في مجرد الثورة لكرامتهم..... ازاي تبقي شايفة حقك و حق بنتك بيضيع كل يوم حتة و انت راضية و ساكتة ....... هو في اية؟؟؟؟؟؟ هو احنا لية الستات عندنا مبتغيرش علي حقوقها؟؟؟؟؟

سيظل بقي الكوم الكبير وصول الاسلاميين للحكم .... و دة بقي اللي بيخليني مش عارفة انام بليل لما هي الحالة ج كدة و احنا لسة مدخلناش في عصر حرام يا اختي و النقاب فرض امال بقي الحالة حتبقي اية ..... و نفسي افهم اية مستوي الضغط اللي لو مورس اكتر من كدة علي الستات ممكن  ينفجروا ماهو اكيد هما لازم ينفجروا و يعملوا ثورة... مظاهرة..... اي منظر.... نقول بية ان احنا عندنا دم و عندنا احساس. دة حتي احساس المرارة اللي انا باحس بية مش موجود عند ستات كتير من اللي بقابلهم عندهم حالة من اللامبلاة غير عادية و تعايش سلمي مع كل الانتهاكات اللي بتحصل ضدهم. 

في وسط كل  دة بتخيل الرائدة درية شفيق( التي اطلقت عليها إذاعة مونتي كارلو انها الرجل الوحيد في مصر) سنة 51 و هي بتقتحم البرلمان المصري علي رأس 1500 ست للمطالبة للسيدات بحق التصويت في الانتخابات البرلمانية و الترشح لها ايضا و اقول لنفسي لية حركة تحرير المرأة وقفت عند الدكتورة درية ..... لية ماحصلش ان واحدة ست طلعت  و اقتحمت مجلس الشعب و اعتصمت فية لما فكروا يلغوا قانون الخلع و يقللوا سن الحضانة؟؟؟!!

واجعني قوي ان تكون الستات و المسيحيين في مصر هم ملطشة العصر الحديث... واجعني قوي ان صفوت حجازي ووجدي غنيم و اتباع سيد قطب هما اللي يحطوا دستورنا.

سكت الكلام....

Sunday, April 29, 2012

سموا الاشياء باسمائها ..... انها الكراهية


انة مقال مني الطحاوي الذي نال حظا لا باس بة من الشتائم و اللعنات و ربما بعضا من اللة عليكي يا ست اعد كمان ..... قريت المقال لقيت انة بعض الناس بتهوي الضجة للضجة فقط ..... هي مني الطحاوي كانت قالت حاجة جديدة مثلا و لا علشان الموضوع تحول من كلمات براقة زي التمييز ضد المرأة و العنف ضد المرأة و اضطهاد المراة الي كلمة اكثر وضوحا و شمولية و تلخص كل ما سبق في كلمة بسيطة الا و هي كراهية المرأة الموضوع بسيط وسهل الستات فعلا مكروهة في عالمنا العربي و ستجد من ينبري ليجد اعذار و ربما اسباب من الدين ليبرر لنفسة و يعطي لنفسة الحق في هذة الكراهية......... اية المشكلة بقي هي مني الطحاوي كانت قالت حاجة جديدة.

مش مجلس الشعب قدم طلب لمراجعة كل القوانين الاسرة التي تم وضعها ايام المخلوع بحجة ان هذة القوانين الهدف منها هو تقويض بنيان الاسرة المصرية و للي ما يعرفش اية هو بنيان الاسرة المصرية احب اعرفة.... بنيان الاسرة المصرية في ما قبل العصور الاسلامجية الحديثة هو عبارة عن رجل بكرش.... امراة محجبة و يا حبذا لو كان خمار (النقاب لسة مش واكل مع الرجالة قوي بس جاي) شوية مقاريض لا يقلوا عن ثلاثة و إلا كانت وحشة في وش الست (مش خصبة و كدة انتوا فاهمين طبعا)اما بقي الروتين اليومي فهو الرجل ذو الكرش يستيقظ من نومة ليجد الافطار جاهز و الحمام جاهز و ياحبذا لو الست جت ليفتة طبعا كل دة بالنسبة لة مسلمات مش امور يستحق الشكر عليها ...المقاريض صاحيين و لابسين وجاهزين للمدرسة و طبعا في حد قبل كل دول صاحي علشان يفطر و ياكل و يشرب الجميع و ينزل الرجل ذو الكرش مع باقي المقاريض و هو متافف من انة حيشيل مسئولية توصيلهم للمدرسة ينزل حتي بدون كلمة شكر للزوجة اللي في الاغلب كانت خريجة جامعة و متعلمة و في الاغلب برضة كانت بتشتغل قبل ما تشوف خلقة الكائن ابو كرش بس لان المرأة في مجتمعنا كائن متربي علي التنازل كانت هي الشخص اللي لازم يتنازل عن احلامة في مقابل الزواج من ذو الكرش علشان ما تخدش لقب عانس.
هو دة بروفايل الاسرة المصرية و البنيان اللي خايفين يهدوة نواب و نايبات مجلس الشعب خايفين من ان الست تبقي اكتر من مجرد دادة و خدامة في بيتها و انا هنا مش بقلل من من دور الست كأم لكن مش معني كدة انها تتحول لعبدة. عبدة كل هدفها في الحياة هي راحة رجل لن يسهر ابدا علي راحتها و لن يكون ابدا بجوارها و استثني من ذلك بعض الرجال و ان كانوا قلة.

 اية بقي المشكلة .... المشكلة انة اي تحول حيحصل في هذا الشكل الاسري بداية من وعي المرأة بحقوقها نهاية باستعمالها هذة الحقوق فعلا حيهد صورة المراة العبدة و حيجرأ الستات لطلب المزيد من الحقوق و هنا هي المشكلة الرجالة لا يقبلون المشاركة هما مش عايزين الستات هو دة لب الموضوع زي ما الانجليز بيقولوا bottom line  .....  شرع او مش شرع الرجل العربي لا يجد في المرأة اي كان منصبها اكثر مما يجد الرجل المخمور في الراقصة الشرقية ... حاصلة علي الدكتوراة بس صدرها صغير..... بتتكلم ثلاث لغات بس الهنش بتاعها كبير و هكذا دواليك. الرجل يستطيع ان يستخدم عقلة في ابداع اعظم الاشياء و لكن عندما يري امراة لا يستطيع الا ان يفكر بنصفة السفلي .

و تظل مشكلة بنيان الاسرة المصرية الذي يجب ان ستمر فوق اجساد النساء. لا بأس من ان تضرب قليلا من زوجها .... دي محبة يا هبلة.... لا ضير ان تجد صور لة في اوضاع مخلة يشاركها مع صديقاتة علي الفيس بوك.... الست العاقلة تطنش و تكبر  دماغها كل الرجالة بيخونوا.... لا بأس من انها لا تحصل حتي علي حقوقها الشرعية في الفراش ..... الست المتربية ما تتكلمش في الحاجات دي.

هذا هو البنيان الذي يحاول المجلس جاهدا في الابقاء علية كيان قائم علي الظلم و عدم المساواة كيان يرمي بكل ثقلة علي كتفي امرأة حمولة و يطلب منها ان لا تتأوة من ثقلة ..... لية ؟علشان صوت المرأة عورة.

و بعد كل دة نجد ان مني الطحاوي لازم تتشتم علشان كشفت النقاب عن الكلمة التائهة عن قاموسنا في وصف حالة المرأة في بلادنا أنها الكراهية بدون تجميل او تزييف.

للحديث بقية......

Thursday, April 12, 2012

الصمت

عندي كلام كتير نفسي اقولة بس محشور في زوري مش عايز يطلع منظم و لا عايز حتي يطلع خلاص



اقول حاجة واحد بس إياكش تولع بجاز أنا زهقت!!!!!

Tuesday, March 13, 2012

إحنا معندناش ستات في مصر

اكتشفت اخيرا ان مصر مافيهاس ست...... اة و اللة مافيهاش ست.... و دي بالمناسبة مش مدح دة شتيمة تقدر تعتبرة سب دين كدة ...... زي ما حد يدخل بيتكوا و يقولكوا يا عيلة ما فيهاش راجل كدة اكيد مش حاتخدة بالحضن و تديلة واحدة فرنش.... احنا بقي بلد مافيهاش ست لية علشان البلد دي لو فيها ستات بجد ماكنتش قضية سميرة إبراهيم تطلع فشنك...... البلد دي لو فيها ستات بجد كانت وقفت وقفة ست واحدة و جابت حقها بايدها.......... بس إحنا بلد ماعلافتش تجيب ست.


مستنيين اية لما البرلمان يمنعكوا من الخروج من البيت إلا علي القبر زي ما قال سيد قطب .... و لا لما تلاقي جوزك داخل عليكي بواحدة و يقولك حقي الشرعي يا مرا و لو مش عاجبك امشي....مستنية لما تتنقبي بالعافية و لا لما تتمنعي من السواقة.... مستنية لماحازم صلاح ابوإسماعين يقعدك في البيت و يخليكي تمدي ايدك او تشتغلي اقدم شغلانة في التاريخ.......انا عايزة افهم حتفضلوا خانعين و صامتين و انصاف بشر كدة لحد امتي ..... خلاص الكرامة اللي خلقها ربنا معانا بالفطرة ماتت جواكوا .... امتي حتقوموا بعد ما يدهسوكوا اكتر من كدة.

اة يا بلد ماجبتش ست

Monday, March 12, 2012

هرتلة

مافيش حاجة غير اني عايزة اتكلم بقالي زمن ما قلتش حاجة و لو ان اللي حاقولة عمرة ما حيفيد بس عايزة اتكلم.....

سميرة إبراهيم ...... الدكتور المحترم خد براءة و السلفيين بيعملوا تجميل لمناخيرهم و يطلع الدكتور مدرس العاب.... و الاخوان و السلفيين برضوا بتوع اختي كاميليا فرحانين في بنت محجبة اتعرت و بيقولوا اية نزلها علشان تتربي

و المجلس العسكري سفر الامريكان المتهمين بقضية تمويل غير مشروع الهدف منها الاضرار بمصالح البلد ....و الشرطة قفلت باب الاستاد باللحام علشان العيال تموت... و اسماء محفوظ محكوم عليها بسنة سجن في تهمة ضرب شحط طول بعرض ..... و حسني مبارك لسة مارحش طرة بعد سنة من الثورة.... و دوا الاكتئاب بتاعي شاحح من السوق و الدكتور اضطر يغيرة .... وجلال عامر مات.... عكاشة قدام السفارة الامريكية..... و 6 أبريل بقوا خونة....و التحرير بقي عيب .... هياتم لرئاسة الجمهورية.... و السلفيين حيمنعوا المواقع الاباحية.... و حيبقي في مناهج للولاد غير البنات.... و سفارة اسرائيل بقت في التجمع الخامس....قتلة الشهداء في السيدة زينب براءة.... و الجيش حمي الثورة..... و عساكرنا ماتوا علي الحدود.... و بورسعيد رافعة علم إسرائيل و بتهدد بالانفصال عن مصر....بس المجلس حمي الثورة.... النائب العام ماجبش اللي عملوا مذبحة بورسعيد بس جاب احمد دومة بتاع المجمع العلمي..... و احمد حرارة اتعمي..... و الغازطلع منتهي الصلاحية.... بس الجيش حمي الثورة.... ابو الشهيد احمد بسيوني مات و حق ابنة ماجاش...... و الشرطة نفسيتها تعبانة.... بس الجيش حمي الثورة.

Tuesday, November 22, 2011

ان تموت سحلا

لا اجد من الكلمات ما اعبر بة عن ما يحدث في التحرير و لكن ساقول كلمة اخيرة قبل ان انزل

احنا اللي عملنا في نفسنا كدة سيبناهم يستفردوا بينا واحد ورا التاني

ماوقفناش لما قبضوا علي شباب زي الفل و سيبناهم يقولوا عليهم بلطجية و

موقفناش لما سحلوا المسييحين اخواتنا قدام ماسبيرو كنتوا فاكرين اية ان الدور مش حييجي عليكوا طب مبروك الدور جة و مينا مش احسن مني
انا نازلة و اللي عايز يقعد خايف علي لقمة عيشة بالهنا و السفا ياكلها متعاصة بدم الغلابة اللي بيموتوا علشانة

سلام يا بلد الكلام