مصر

مصر

Thursday, September 8, 2011

إنجازات المجلس العسكري حامي حمي البلاد

إدخال الجمال علي المتظاهرين في الميدان فيما عرف بموقعة الجمل
اللة الموفق و المستعان
الكشف علي بكارة البنات و لا أجدع داية
الكبيرة بقي : صباع الفنجري
فض اعتصام ميدان التحرير في 9 ابريل بالبيادة
عرفنا أن صربيا هي اللي كانت بتمول الثورة
الجدار العازل اللي بيحمي سفارة إسرائيل " أصل بيني و بينكم السفير الإسرائيلي حساس شويتين " بس و اللة الناس عداهم العيب كتبوا علي السور اللي بيحمي سفارة إسرائيل مصر فوق الجميع!!!!!
و جدير بالذكر الاعمال الفنية اللي بيقوم بيها الجيش من تشكيلات رائعة لعساكر الامن المركزي علشان يحمي الصينية لان الصينية ذات موقع استراتيجي اهم من الحدود
طبعا ما نقدرش ننسي أنة دة كان نتيجة طرد المتظاهرين اللي كانوا مبوظين شكل الميدان بأسلوب حضاري " مش مصدقني راجع الصور"
طبعا ما ننساش كتر خيرهم جابولنا العيد بدري يوم
و خلصوا من بعض الإراهابيين لا لا مش اللي حرقوا الكنيسة يوووووووووووووووة لا بردوا مش اللي ضربوا الجنود علي الحدود لا يا ابني و لا اللي احتلوا القسم في العريش دي كلها عيال هايفة و حتتلم بإذن اللة أنا بأتكلم عن الاخطر من كدة بكتير التراس الأهلي أيوة التراس الأهلي!! أصلوا دة تنظيم خطير أة و اللة اخطر من السلفيين علي البلد و حولوهم علي طرة شفت الجمال يعني العيال حينوبهم من العز بتاع جمال و علاء
الأهم أن المجلس قرر يخلص من المدونيين اللي " حيبوظوا البلد" وحيجرم التدوين و الكتابة علي الانترنت يعني كل واحد حيحط لسانة في بقة و يقعد ساكت مين بقة يا ولاد اللي مهيص في الموضوع دة أخواتكم الاخوان
الأهم من كل دة هو عودة الشرطة للعمل بكامل جبروتها قصدي قوتها و ان الرئيس "هشتكنا و بشتكنا لسة بيتعملوا تحية عسكري"و

اللة الموفق و المستعان

2 comments:

Foxology said...

ومن أهم انجازاته برضه استمرار حالة الطوارئ والعجيب الرهيبهو انه كل لما يحذر من حدوث فتنة أو حالات شغب أو خروج عن النص بيحصل فعلا بعد التحذير بيومين تلاتة بالكتير !!

تحياتى

IBN BAHYA - إبــن بهيـــــــــــــة said...

إيه يا مفقوع’ الكلام ده؟
مش عاجبك ليه بقى يا أختي
مجلس قيادة الفلول والثورة المضادة؟
ده مجلس حماية النظام مش الثورة
روحي كده وانتي ثورجية كخه

أيوه أنا مش غبن بهية .. أنا طالع على روكسي
هناك أكسب واربح كتير خدنا منكم إيه يا ثورجية؟


ده اللي عايز مجلس قيادة الفلول يوصلنا ليه ... ويستمر الفساد والإفساد في بر مصر

بعد ما سيدهم المخلوع أفسد البلاد .. جايين الكلاب يفسدوا أي شيء باقي

لكن ده بعدهم هم وأسيادهم آل سعود بنو النضير .. والله مصر هتكسب وبكره افكرك

وتغيري اسمك من مفقوعة إلى منصورة وفايزه ومنتصرة بإذن الله

أرق تحياتي
يا أعظم بنات في الكون .. بنات مصر .. ضفر الواحده منكن بميت مشير خائن ومليون شيخ جاهل عبيط وبريالة

تحياتي